Me sulmet në terrenin e luftës që vijojnë, Ukraina, Rusia dhe SHBA vijojnë përpjekjet e vështira për arritjen e një marrëveshje paqeje sipas propozimeve amerikane. I dërguari i Shtëpisë së Bardhë për paqen Steve Witkoff mbërriti në Rusi këtë të premte dhe do të jetë sot në Moskë për bisedime të mëtejshme me zyrtarët rusë, ndërsa zhvilloi një takim me presidentin Vladimir Putin, mbi planin e paqes të Donald Trump për Ukrainën. Por ngërçi është tashmë tek disa pika të planit të Trump që europianët dhe Ukraina I kanë refuzuar në 17 prill në Paris dhe 23 Prill në Londër.
Reuters ka parë dokumentin me propozimet amerikane që përfshin njohjen de jure të Krimesë si pjesë të Rusisë dhe njohjen de facto të kontrollit rus mbi zona të tjera të Ukrainës lindore dhe jugore. Ndërkohë propozimi ukrainas-evropian shtyn çdo diskutim territorial deri pas armëpushimit, pa asnjë njohje të kontrollit rus mbi territoret e pushtuara.
Plani amerikan përfshin gjithashtu heqjen e plotë të sanksioneve kundër Moskës (përfshirë ato të vitit 2014) si pjesë e marrëveshjes. Propozimi ukrainas-evropian në vend të kësaj propozon një heqje graduale vetëm pasi të arrihet një paqe e qëndrueshme, me mundësinë e rivendosjes së sanksioneve në rast të shkeljeve nga Rusia. Paqartësive nëse palët do arrijnë një dakordësi këtë javë iu shtua edhe kërcënimi amerikan se do të tërhiqet nga bisedimet. Donald Trump tha të enjten nga salla ovale se ai ka një afat në mendje deri në të cilin do të tolerojë refuzimin e Rusisë dhe Kievit ndaj propozimeve.
Në të njëjtën ditë, ministri i jashtëm rus Lavrov tha për CBS amerikan se Trump ka të drejtë kur thotë se po ecet në drejtimin e duhur për paqen. Lavrov konfirmo se ushtria ruse nuk do të ndalë sulmet ndaj Ukrainës duke siguruar se ato do të bëhen vetëm ndaj ushtrisë ukrainase, krejt e kundërt më çfarë është parë me 10 ditët e fundit, kur Rusia ka vrarë dhjetëra civile në sulmet ndaj zonave urbane.
