Këtë fundjavë u njoftua se Kina dhe Shtetet e Bashkuara do të takohen në Zvicër për të hedhur themelet për negociatat tregtare. Ky takim vjen për herë të parë që kur Donald Trump vendosi tarifa për mallrat kineze dhe Pekini iu përgjigj.
Siç raportojnë mediat, Ministria kineze e Tregtisë paralajmëroi sot se Kina nuk do të sakrifikojë qëndrimin e saj parimor dhe do të mbrojë drejtësinë gjatë këtij takimi midis zëvendëskryeministrit të saj He Lifeng, Sekretarit të Thesarit të SHBA-së, Scott Besant dhe Përfaqësuesit të Tregtisë të SHBA-së, Jamieson Greer.
“Nëse Shtetet e Bashkuara duan ta zgjidhin problemin përmes negociatave, ato duhet të përballen me ndikimin serioz negativ mbi veten dhe botën nga tarifat e tyre të njëanshme”, shtoi ai në një deklaratë.
Të dy palët do të takohen të shtunën dhe të dielën për të hedhur themelet për negociatat e ardhshme. Për të mbështetur një ekonomi të rënduar nga konsumi i ngadaltë dhe lufta tregtare me Shtetet e Bashkuara, Pekini njoftoi gjithashtu sot një ulje të normave të interesit, si dhe të sasisë së rezervave të detyrueshme të bankave për të lehtësuar kreditimin.
Pasi Donald Trump u rikthye në Shtëpinë e Bardhë në janar, administrata e tij vendosi tarifa të reja doganore me një total prej 145% për mallrat me origjinë nga Kina, të cilave u shtohen edhe masa sektoriale. Pekini u përgjigj duke vendosur tarifa prej 125% mbi importet amerikane në Kinë, si dhe masa më të synuara.
Këto nivele konsiderohen të padurueshme nga shumica e ekonomistëve, deri në atë pikë sa Shtetet e Bashkuara dhe Kina, si dhe vendet përtej tyre, kërcënohen nga recesioni dhe ndoshta nga një rritje e madhe e çmimeve. Negociatat e 10 dhe 11 majit do të jenë një angazhim i parë zyrtar publik nga dy ekonomitë më të mëdha në botë për të zgjidhur këtë luftë tregtare.
