Policia e Kavajës thotë se ka arrestuar 5 persona, si dhe ka shpallur në kërkim një tjetër në lidhje me ngjarjen e ndodhur të enjten. Sipas policisë rreth orës 12:20, në lagjen Nr.4, në afërsi të Teqesë në Kavajë, pas një konflikti për motive të dobëta mes disa shtetasve, ku u përdorën dhe armë zjarri dhe për pasojë humbi jetën një kalimtar si dhe u plagosën 5 të tjerë.
Të arrestuarit
Marjus Aliu 31 vjeç, lindur dhe banues ne lagjen Nr. 1 Kavaje, për veprat penale të “Vrasje në rrethana të tjera cilësuese, kundër dy ose më shumë personave”, “Vrasje me paramendim, e kryer në bashkëpunim e ngelur në tentativë” dhe “Prodhim dhe mbajtje pa leje e armëve dhe municioneve luftarake”;
Ardian Dedej 43 vjeç, lindur dhe banues ne lagjen Nr. 4 Kavaje, (i denuar me pare), për veprat penale të “Vrasje në rrethana të tjera cilësuese e kryer në bashkëpunim, e mbetur në tentativë’ dhe “Mbajtje pa leje e armëve dhe municioneve luftarake”;
Eraldo Hyka 22 vjeç, lindur dhe banues ne lagjen Nr. 5 Kavaje, për veprat penale të “Vrasje në rrethana të tjera cilësuese e kryer në bashkëpunim, e mbetur në tentativë” dhe “Mbajtje pa leje e armëve dhe municioneve luftarake”;
Qazim Merkaj 25 vjeç, lindur dhe banues ne lagjen Nr. 5 Kavaje, për veprat penale “Vrasje në rrethana të tjera cilësuese e kryer në bashkëpunim, e mbetur në tentativë” dhe “Mbajtje pa leje e armëve dhe municioneve luftarake”;
Agron Kollçaku 39 vjeç, lindur dhe banues ne lagjen Nr. 6 Kavaje, për veprat penale të “Moskallëzim i Krimit” dhe “Veprime që pengojnë zbulimin e së vërtetës”.
Në kërkim
Denis Aliu 33 vjeç, lindur dhe banues ne lagjen Nr. 1 Kavaje, për veprat penale “Vrasje në rrethana të tjera cilësuese, kundër dy ose më shumë personave”, “Vrasje me paramendim, e kryer në bashkëpunim e ngelur në tentativë’ dhe “Prodhim dhe mbajtje pa leje e armëve dhe municioneve luftarake”.
Çfarë ndodhi të enjten
Një i vrarë dhe 5 të plagosur është bilanci tragjik i një përplasje me arme mes dy grupesh në Kavajë. Ngjarja e rëndë ndodhi në hyrje të qytetit ku disa të rinj janë konfliktuar fillimisht verbalisht dhe më pas kanë nxjerrë armët duke qëlluar në drejtim të njëri-tjetrit.
Si pasojë e të shtënave, ka mbetur i vdekur në vend 52-vjeçari Ramazan Hasalliu, një kalimtar i rastit që në ato momente ishte duke blerë bukë në një dyqan pranë vendit ku ndodhi përplasja.
Sipas policisë, autorë të vrasjes dyshohet se janë vëllezërit Denis dhe Marjus Aliaj. Ky i fundit ka mbetur i plagosur dhe mbahet nën vëzhgim nga policia në ambientet e spitalit të Durrësit, ndërsa në kërkim është shpallur vëllai i tij. Edhe të plagosurit e tjerë janë jashtë rrezikut për jetën në spital, dhe sipas policisë të gjithë kanë qenë të përfshirë në konflikt.Sipas burimeve nga policia, mësohet se vëllezërit Aliaj janë konfliktuar fizikisht mbrëmjen e së mërkurës me Elio dhe Erald Hyka, edhe këta vëllezër me njëri-tjetrin. Të dy merreshin me sportin e mundjes dhe tashmë janë shpallur në kërkim nga policia.
Të dyja palët kishin lënë një takim për t’u sqaruar, por gjithçka ka degjeneruar në përdorimin e armëve që të rinjtë kishin marrë me vete. Përveç pistës së një përplasje për motive banale, është duke u hetuar edhe nëse të rinjtë kanë pasur arsye të tjera për të nxjerrë armët ndaj njëri-tjetrit./ Opinion.al
