Shtetet e Bashkuara të Amerikës kanë dhuruar mbi 2 milionë dollarë për Shqipërinë për të përballuar pandeminë e koronavirusit.
Në një postim në Twitter, ambasadorja Yuri Kim, tha se kjo shifër u arrit pas shifrës më të fundit, prej 900 mijë dollarësh, siguruar nga qeveria amerikane për vendin tonë. Sipas saj, këto fonde janë dhënë për laboratorë, gjurmimin e rasteve dhe ndihmën teknike.
“Do të qëndrojmë gjithmonë krah miqve tanë dhe do të udhëheqim luftën kundër kërcënimeve globale”, shkruan kryediplomatja amerikane.
Në përmbledhjen e Departamentit të Shtetit thuhet se në 20 vitet e fundit, nga e gjithë shuma prej gati 700 milionë dollarësh që Shtetet e Bashkuara kanë investuar në Shqipëri, gati 52 milionë dollarë kanë shkuar për shëndetësinë./Opinion.al
