Franca deklaroi se kompania kineze Huawei, nuk do të përjashtohet nga furnizimi i pajisjeve për rrjetet 5G, por mund të jetë subjekt i kufizimeve.
“Nuk ka asnjë diskriminim ndaj Huawei. Jo, Huawei nuk do të përjashtohet nga 5G në Francë”, tha ministri i Ekonomisë dhe Financave i Francës, Bruno Le Maire, për televizionin BFM.
Megjithatë, ai shtoi se “shteti do të marrë masa paraprake për të mbrojtur interesat sovrane, veçanërisht afër instalimeve bërthamore dhe ushtarake.”
Franca nuk është vendi i vetëm që nuk i është bindur kërkesës së Shteteve të Bashkuara, për të mos bashkëpunuar me kompaninë kineze, të cilën SHBA-ja e konsideron rrezik për sigurinë kombëtare.
Në fund të muajit janar, Mbretëria e Bashkuar vendosi po ashtu që të lejojë kompaninë kineze Huawei, të vazhdojë operimin në rrjetin 5G, por me kufizime./Opinion.al
