Papa Françesku u takua në Romë të mërkurën me familjet e izraelitëve që mbahen rob nga Hamasi në Rripin e Gazës.
Takimi u zhvillua me iniciativën e Ambasadës së Izraelit në Romë. Papa Françesku u zotua para delegacionit izraelit se do të punojë për të sjellë në shtëpi dy civilë izraelitë dhe dy ushtarë.
Takimi zgjati 45 minuta dhe morën pjesë ambasadori izraelit në Vatikan, Raphael Schutz, shefi i seksionit të Diasporës dhe Çështjeve Fetare në Ministrinë e Jashtme, Shuli Davidovich dhe ambasadori i Izraelit në Romë, Alon Bar.
Familjarët kërkuan ndihmën e Papës dhe Kishës Katolike për të rimarrë trupat e dy ushtarëve, Hadar Goldin dhe Oron Shaul, dhe lirimin e dy shtetasve izraelitë, Avraham Mengistu dhe Hashem al-Sayid.
Papa shprehu ngushëllimet e tij për vuajtjet e nënave dhe familjeve. Ai u zotua të punojë me qeveritë dhe udhëheqësit fetarë për të ndihmuar në kthimin e fëmijëve të tyre.
Françesku bëri lutje për kthimin e shpejtë dhe të sigurt të robërve të gjallë në familjet e tyre.
Ministria izraelite e Punëve të Jashtme dhe Mbrojtjes organizoi vizitën në Romë si pjesë e një fushate ndërkombëtare për të ngritur vëmendjen globale për këtë çështje pasi familjet akuzuan qeverinë dhe udhëheqjen e ushtrisë izraelite se “nuk kanë bërë asgjë për të liruar fëmijët”.
Burimet izraelite thanë se takimi diskutoi pretendimet e javës së kaluar nga lideri i Hamasit në Gaza, Yehya Sinwar, se Izraeli po pengonte të gjitha përpjekjet për të arritur një marrëveshje për shkëmbimin e të burgosurve. Ai paralajmëroi se Tel Aviv kishte një kohë të kufizuar për të përfunduar marrëveshjen, ose nuk do të ketë në të ardhmen./Opinion.al
