Ish-zyrtari i lartë i policisë, Artan Cuku u ekzekutua në prill 2017 në hyrje të pallatit të tij. Tani pas një viti, hetimet janë drejt fundit dhe prokuroria e krimeve të rënda ka shpallur në kërkim, personin që dyshohet se porosi vrasjen e tij, Bledar Jambellin nga Fieri. Ekzekutimin e ka kryer vrasësi me pagesë Mikel Shallari, i arrestuar tashmë nga policia. Tashmë është e qartë se kryekomisar Artan Cuku u vra për shkak të detyrës.
Arrestimi i Jambellin në vitin 2012, kur Artan Cuku ishte drejtor i Policisë së Vlorës
Në fund të vitit 2012, Cuku asokohe drejtor i policisë së Vlorës me iniciativën e tij ka rihapur dosjen e disa ngjarjeve të rënda në Vlorë, mes tyre edhe atë të ndodhur në vendin e quajtur “Pusi i Mezinit”, mes dy grupeve kriminale, që zanafillën e ka në Spanjë për trafik droge e femrash. Në 2012, policia e Vlorës arrestoi Bledar Jambellin. Ky person dyshohej se ka vrarë Amarildo Delajn në shtator të vitit 2012 dhe të fortin e Vlorës, Shpëtim Muka në vitin 2006 te Pusi i Mezinit. Dyshohej se ngjarjet kanë lidhje mes tyre dhe kanë ndodhur si pasojë e konflikteve në Spanjë me Sokol Ramën. Prokuroria e Vlorës kishte ngritur akuzën se këto dy atentate janë realizuar nga i njëjti person, 32-vjeçari Bledar Jambelli, i cili u prangos nga Policia e Vlorës dhe dyshohet se është paguar për të kryer këto vrasje nga rivalët e viktimave. Megjithatë, nga Policia e Vlorës deklarohet se për vrasjen e vitit 2006, Jambellit i kanë dalë gjurmët e gishtave në makinën e krimit, ndërsa për vrasjen e vitit 2012, ende nuk ka prova të mjaftueshme për të vërtetuar implikimin e tij.
Bledar Jambelli, i njohur edhe si Rikard Muho, 38 vjeç, lindur dhe banues në Mbrostar të Fierit ia doli ti shpëtonte drejtësisë dhe të porosiste 5 vite më pas vrasjen e personit që e çoi në pranga, Artan Cukut.
*Më poshtë kronika e vitit 2012 për arrestimin e Jambellit
