Kryeministri Edi Rama është përfshirë në debatin e ditëve të fundit në lidhje me çështjen e historisë së Luftës Antifashiste Nacional Çlirimtare. Rama në këtë 5 maj përmendi drejtpërdrejt Drejtorin e Institutit të Krimeve dhe Pasojave të Komunizmit, Agron Tufa, për të cilin tha se paguhet nga taksat e shqiptarëve.
“Duke mos lejuar që në emër të studimeve të krimeve të komunizmit të cënohet një fije floku, cilitdo që mori armët për të luftuar fashistët dhe nazistët në luftën anti-fashiste nacional çlirimtare.
Dhe në këtë aspekt qëndrimi im është shumë i qartë dhe i palëkundur. Çfarë ndodhi dhe si ndodhi në pikëpamje të luftës për çlirim deri në 29 nëntor të vitit 1944 nuk mund të jetë kurrë objekt i një instituti që paguhet nga taksat e shqiptarëve. Çfarë erdhi pas ka qenë objekt i punës së atij instituti dhe i takon Kuvendit të Shqipërisë të bëjë të gjitha vlerësimet e nevojshme në raport me ligjin apo me shkeljen e ligjit. Në raport me dobinë apo me dëmin e shkaktuar nga një i tillë institut”, deklaroi Rama.
Por përse është hapur ky debat?
Libri “Krimet e Komunizmit”, shkruar nga Çelo Hoxha, bëhen përgjegjës drejtuesit e fomacioneve partizane për krimet e luftës. Në librin që përkon me periudhën 1941-1945 janë publikuar 265 emra, të cilët, sipas autorit të librit, janë përgjegjës për “krimet e luftës” së asaj kohe. Ky libër është botuar nga Instituti i Studimeve për Krimet dhe Pasojat e Komunizmit, i drejtuar nga Agron Tufa, e që si nënkryetar ka Çelo Hoxhën, autorin e librit.
Kjo “listë e zezë” dhe periudhën që ka përfshirë ka ngjallur zemërimin e deputetit Spartak Braho.
Në mbledhjen e datës 2 prill, në Komisionin parlamentar të Ligjeve, ku në shqyrtim ishte projektrezoluta për veprimatarinë e ISKK-së për vitin 2018, deputeti socialist ka kërkuar shkarkimin e Agron Tufës. Braho ka akuzuar Tufën për mënyrën e drejtimin të institucionit, botimet e së cilës sipas tij janë “të paligjshme” dhe vetë Instituti është kthyer në “seksion të Ballit Kombëtar”. Tufa, sipas Brahos po “nxin” historinë e Luftës Antifashiste Nacionalçlirimitare dhe heronjtë e saj.
Por vet Tufa nuk e ka lënë me kaq replikën e Spartak Brahos. Ai e ka akuzuar atë se ka dënuar politikisht gjatë kohës së regjimit të Enver Hoxhës njerëz të pafajshëm, duke i mbyllur në çmendinë.
Në një postim në rrjetin e tij Facebook, Tufa ka shkuar edhe më tej, duke publikuar një dokument që tregon dënimin kapital të dhënë nga Spartak Braho gjatë periudhës komuniste. Braho ka vijuar replikën, duke e akuzuar atë dhe Gazment Kapllanin si vrasës me pagesë.
Pas ditësh të tëra akuzash dhe kundërakuzash me tone të forta, drejtori i Institutit të Krimeve dhe Pasojave të Komunizmit, Agron Tufa ka hedhur në gjyq Brahon, që e konsideron si “çanta e zezë” me akuzën “krime kundër njerëzimit”.
Agron Tufa thotë se ka dokumente dhe fakte për krimet e kryera nga partizanët dhe gjatë regjimit diktatorial të Enver Hoxhës. Ai pretendon se gjatë ushtrimit të detyrës së tij është intimiduar dhe kërcënuar nga persona publikë. Zoti Tufa ka bërë një padi penale ndaj këtij të fundit dhe disa personave të tjerë, përfshi këtu edhe zotin Braho. /Opinion.al
