Nga miq, në armiq. Kështu mund të përkufizohet marrëdhënia mes Rektorit aktual të Universitetit të Tiranës, Mynyr Koni dhe dekanit të Ekonomisë, Dhori Kule. Ajo që dihet është se Kule ka qenë një nga mbështetësit e Konit për të marrë drejtimin e Rektoratit, një garë gjatë të cilës nisën hetimet për kërcënimin e Mynyr Konit nga Emiljano Shullazi.
Pas deklaratave të kryeministrit Edi Rama në lidhje me bibliotekën online se rektori i UT po e pengon, ka ardhur dhe reagimi i këtij të fundit. Por teksa heq përgjegjësinë nga vetja, Mynyr Koni akuzon tre dekanë (Dhori Kule, Artan Hoxha dhe Artur Sula) se duan ta rrëzojnë nga postin. Madje zoti Koni shkon dhe më tej, teksa thotë se edhe qeveria po mban anën e tyre.
- Biblioteka elektronike, një nga sulmet që u bë nga Rama, Mynyr Koni thotë se cdo student duhet të jap nr. personal ID dhe për këtë po konsultohet me Komisionerin për Mbrojtjen e të Dhënave Personale
- Rikonstruksioni i godinave të Fakultetit të Ekonomisë. Për këtë akuzon drejtpërdrejt dekanin, Dhori Kule.
“Megjithëse i jam drejtuar me kërkesa të vazhdueshme Administratorit, ky i fundit nuk filloi asnjë procedurë prokurimi që lidhej me rikonstruksionet e gadinave të fakulteteve të UT, veçanërisht për rikonstruksionin e Fakultetit të Ekonomisë. Për këtë mungesë përgjegjësie të Administratorit i jam drejtuar disa herë zyrtarisht Bordit të Administrimit. Nga ana e këtij të fundit, si gjithmonë, nuk ka patur asnjë reagim apo veprim në përmbushje të misionit për të cilin janë zgjedhur”.
- Pakti për Universitetin. Sërish akuzat e rektorit të UT-së janë për tre dekanët: Dhori Kule, Artan Hoxha dhe Artur Sula. Mynyr Koni prej kohësh ka kërkuar një hetim të tenderave të paraardhësit të rij, Dhori Kule, ndërsa për këtë çështje ka dhe një hetim nga prokuroria e krimeve të rënda.
Sa i përket një auditi të bërë nga ministria për Universitetin e Tiranës (Ministria e Arsimit ushtroi kontroll në Universitetin e Tiranës gjatë muajve shkurt-mars 2018, ku konstatoi problematika të rënda administrative nga ana e Rektorit Mynyr Koni), rektori thotë se nuk është raport auditimi, por “raporti i një grupi pune të MASR, i fabrikuar në shkelje flagrante të parimit të ligjshmërisë, të paanësisë dhe të objektivitetit, me qëllimin e vetëm për të legjitimuar veprimet dhe mosveprimet e ish-Kancelarit, Bordit të Administrimit dhe Administratorit të UT (veprime me përmbajtje penale të cilat i kam kallëzuar në prokurori që prej muajit gusht 2017 e në vazhdim)“.
- Akuza e drejtpërdrejt e zotit Koni është për ministren aktuale të Arsimit, teksa thotë se “ Mbështetja që MASR u ka dhënë këtyre strukturave dhe ish-kastës drejtuese të UT, u konfirmua hapur edhe me “qokën”më të fundit që bëri ish-Ministrja e Arsimit Sportit dhe Rinisë ditën para se të linte detyrën, duke miratuar Statutin e UT-së me shkelje ligjore, për të cilat vetë ajo i kishte konstatuar dhe i kishte përcjellë në UT për rishikim”.
- Edhe në lidhje me punësimet në Universitetin e Tiranës, sipas rektorit të UT fajin e kanë tre dekanët e fakulteteve të Universitetit të Tiranës, konkretisht: Dhori Kule, Artan Hoxha dhe Artur Sula.
- “Nuk mund të shmanget përgjegjësia për mosplotësimin e pikave të Paktit për Universitetin, duke tentuar të devijosh indinjatën e studentëve dhe të pedagogëve nga Qeveria tek Rektori i Universitetit të Tiranës”, thekson rektori i UT.
Shkeljet e Mynyr Konit, Auditi i Ministrisë: Ka shkaktuar kaos (VITIT 2018)
“Rektori ka vendosur “Për pezullimin nga detyra të kancelarit të UT-së, z. Robert Skënderi”, deri në një urdhër të dytë të tij. Pezullimi i z.Skënderi ka vazhduar pothuajse për 2 muaj. Masat displinore ndaj kancelarit nuk hyjnë në kompetencat akademike dhe protokollare që ligji i njeh rektorit
“Grupi i Punës konstatoi se shpallje publike për vendet e lira për personel akademik, nd/akademik dhe administrativ, kryesisht janë bërë nga Universiteti i Tiranës. citohet se përzgjedhja e kandidatëve fitues do të bëhet nëpërmjet konkurrimit me dosje dhe me intervista të drejtpërdrejta, por nuk ka asnjë të dhënë konkrete për sistemin e vlerësimit të dosjes dhe të intervistës,
Në një prej procedurave të konkursit të shqyrtuar nga Grupi i Punës, në pozicionin e lirë në Departamentin e Kimisë në FSHN, emërohet S.Cenolli me kontratë njëvjeçare për personel akademik si fitues i shpallur nga Komisioni ad hoc, megjithëse sic rezulton nga procesverbali është i sapo diplomuar dhe nuk ka gradën “Doktor“, për pasojë as përvojën në mësimdhënie
*Në shkurt të 2018, pa nisur ende protesta e studentëve, pas debateve për ligjin e arsimit të lartë dhe kompetencave të Universiteteve, 4 dekanë të Universitetit të Tiranës, konkretisht Artur Sula, Edmond Rapti, Artan Hoxha, dhe Dhori Kule kanë dalë në konferencë për mediat ku kërkuan shkakrimin e rektorit Mynyr Koni. /Opinion.al
