Një anticiklon i quajtur Lucifer, që po lëviz nga Afrika ka shkaktuar valën e fundit të të nxehtit që ka përfshirë Italinë.
BBC shkruan se Lucifer parashikohet të shkojë në veri, në pjesën kontinentale të Italisë, duke rritur më tej temperaturat në qytetet përfshirë kryeqytetin, Romën.
Ministria italiane e shëndetësisë ka lëshuar alarme “të kuqe” për temperaturat ekstreme në disa rajone dhe numri i qyteteve që përballen me rrezik të lartë për shëndetin pritet të rritet nga tetë në 15 të Premten.
Ishulli italian i Sicilisë mund të ketë regjistruar temperaturën më të nxehtë të regjistruar ndonjëherë në Evropë – 48.8C (119.8F).
Autoritetet rajonale raportuan shifrën, e cila do të verifikohet nga Organizata Botërore Meteorologjike (ËMO), pranë Sirakuzës të Mërkurën.
Sipas WMO, rekordi aktual zyrtar në Evropë është 48C, i regjistruar në Athinë, Greqi, në 1977.
Vala e nxehtësisë mesdhetare, e cila ka përfshirë disa vende ka regjistruar temperaturat më të larta në dekada dhe ka çuar në përhapjen e zjarreve në të gjithë Italinë jugore, me Sicilinë, Kalabrinë dhe Pulia-n rajonet më të goditura.
Zjarrfikësit italianë të mërkurën thanë se ata ishin përfshirë në më shumë se 300 operacione në Sicili dhe Kalabri gjatë një periudhe 12-orëshe, duke luftuar gjatë gjithë natës për të kontrolluar flakët.
Tre vdekje të lidhura me zjarrin, dy në Kalabri dhe një në Sicili, janë raportuar nga mediat italiane./Opinion.al
