Luan Rama përmes një deklarate për mediat pas raportit të DASH për kanabizimin në Shqipëri është shprehur se vendi ndodhet në situatë alarmante, ndërsa ka kërkuar që të ndërpritet spektakli me policë që korrin kanabis, por të nisë lufta kundër fenomenit.
Ai u shpreh se ka munguar eficenca e veprimit shtetëror, duke sulmuar (pa i përmendur emrin) ministrin e Brendshëm ende në detyrë, Saimir Tahirin.
“Jemi në prag të zgjedhjeve, prandaj duhet reaguar tani, pasi jemi në kushte alarmi, që 2017 mos jetë një kopje e 2016. Jo më spektakle të policëve që çohen për të prerë kanabis, por të parandalojë dhe luftojë këtë veprimtari kriminale. Thirrje institucioneve të reagojnë menjëherë, jo me fraza dhe demagogji dhe akuza, por me veprim konkret për t’iu përgjigjur shqetësimit të DASH”, tha Luan Rama.
Më tej ai shtoi se “ne të LSI e kemi bërë prezent shqetësimin se vendi është kanabizuar. Kemi detyrim ligjor tu përgjigjemi partnerëve.
Kërkojmë që viti 2017 të mos jetë kopje e 2016 përsa i përket drogës”.
