Ambasadori amerikan Donald Lu ka komentuar sot lënien e mandatit nga Saimir Tahiri, duke mirëpritur faktin, që ish-ministri do të përballet me drejtësinë si qytetar i lirë.
“Hetimet po vazhdojën ndaj Saimir Tahirit dhe Adriatik Llallës. Askush nuk është mbi ligjin. Mirëpresim faktin që zoti Tahiri do përballet me drejtësinë si qytetar i zakonshëm pa imunitet”, tha sot Lu gjatë një takimi.
Kjo deklaratë e Ambasadorit Amerikan vjen një ditë pas lënies së mandatit të deputetetit nga ana e Saimir Tahiri, i cili në fjalën e tij nuk ngurroi të prekte me tone kritike edhe poërfaqësuesit e huaj diplomatikë në vend.
Por nga ana tjetër, ndërsa sot ka folur në një gjuhë më të drejtpërdrejtë lidhur me çështjen Tahiri, disa muaj më parë , kur kërkohej nga kuvendi heqja e mandatit të Tahirit, Donald Lu ka qenë shumë më diplomatik në qëndrimin e tij.
“Nuk do të ishte e përshtatshme për mua të them nëse Saimir Tahiri është fajtor apo i pafajshëm. Por, është jashtëzakonisht e rëndësishme që ju si drejtues të shoqërisë civile, ju si të rinj, ju si qytetarë të Shqipërisë të zbuloni të vërtetën”.
Lidhur me këtë çështje, në atë kohë Lu iu drejtua edhe qytetarëve shqiptarë me këto fjalë:
“ Ju nuk jeni gjyqtarë apo prokurorë, por jeni njerëz që votoni. Ju i dhatë besimin tuaj këtij personi si anëtar i kuvendit dhe si ministër i lartë i kabinetit. Është përgjegjësia juaj të kërkoni që publiku të dijë të vërtetën për këtë çështje. Nëse është i pafajshëm, njerëzit duhet ta dinë këtë. Nëse është fajtor, ai duhet të përballet me drejtësinë”. / Opinion.al
