Komisioni i Ekonomisë shkarkoi sot vetëm me votat e PS drejtoreshën e Autoritetit të Mbikëqyrjes Financiare, Enkelejda Shehi, bashkëshorte e Dashamir Shehit të LZHK-së.
Në mbledhje ishin deputetët e LSI Gjovalin Kadeli dhe Geldion Rahovica, të cilët votuan kundër. Deputeti Kadeli në një prononcim për mediat tha se “AMF është një institucion delikat financiar dhe se argumentet për shkarkimin e saj ishin të pamjaftueshme”. Sipas tij nuk pati transparencë. “Procesi ishte i nxituar dhe jo objekti. Çdo ndërhyrje pa vend në AMF është tronditje për tregun financiar”, tha më tej Kadeli.
Kërkesa për shkarkimin e Shehit ishte dorëzuar në Kuvend nga Bordi i Monitorimit, për shkelje që vetë zonja Shehi i ka cilësuar mediokre, të orkestruara nga kreu i bordit, Pajtim Melani, dhe kryetari i komisionit të Ekonomisë, deputeti socialist Erjon Brace.
Disa ditë më parë nga çadra e protestës, Basha paralajmëroi këtë vendim duke thënë se AMF është institucion që kryeministri Rama nuk e ka nën kontroll, ndaj po hakmerret politikisht ndaj drejtoreshës Shehi.
