Lëvizja Socialiste për Integrim ka sulmuar sërish policinë dhe ka bërë kritika për rendin publik.
Deputetja e LSI-së Kejdi Mehmetaj, e ftuar në Report tv, ka ngritur shqetësimin për kultivimin e kanabisit dhe sasinë e madhe të drogës të kapur gjatë këtyre ditëve.
Kejdi Mehmetaj thotë se paratë e drogës dhe të krimit do të përdoren në zgjedhje, dhe në këtë pikë bie dakord me shqetësimin e opozitës.
“Sot pas 27 viteve duhet të bënim shumë hapa përpara për integrimin dhe jo të flisnim për dekriminalizimin se si kemi disa deputetë që kanë rekorde kriminale, që është e tmerrshme të diskutosh sot, por mirë ta diskutosh, por edhe ta mbrosh fenomenin sikur ka ndodhur hapur.
Apo të flasim se si vendi është i mbushur me kanabis. Në mos gaboj vetëm brenda kësaj jave janë kapur gati 23 ton hashash, që do të thotë se ajo është aty dhe puna duhet të ishte bërë më e madhe dhe ne kemi pasur një qëndrim për këtë çështje.
Apo se si paratë e krimit futen dhe bëhen pjesë e zgjedhjeve, pasi qytetarët nuk do të shkojnë me vullnetin e tyre, por me vullnetin e të fortit dhe kështu nuk mund të funksionojë”, tha Mehmetaj.
