LSI ka larguar ish-ministrin e Drejtësisë, Nasip Naço nga nënkomisioni ad hoc për zgjedhjen e anëtarëve të Këshillit të Lartë Gjyqësor dhe Këshillit të Lartë të Prokurorisë.
Largimi i Naços është bërë me kërkesë të Lëvizjes Socialiste për Integrim dhe kërkesa është votuar nga komisioni në mbledhjen e kësaj të hëne. Vendin e Nasip Naços do e zërë deputetja tjetër e kësaj force politike, Silva Caka.
Deputetja e qarkut të Beratit mori mandatin pak ditë më parë, pas shkarkimit të Gledion Rehovicës, i cili rezultoi me probleme me drejtësinë italiane. LSI nuk e kundërshtoi këtë lëvizje, por përkundrazi, Kryemadhi mbështeti hyrjen në Kuvend të Silva Cakës.
