Pas deklaratës së kryetarit të OSBE-së në Tiranë, Bernd Borchardt se akuzat për shitblerje votash duhet të vërtetohen, ka reaguar menjëherë Petrit Vasili nga selia e Lëvizjes Socialiste për Integrim.
Vasili i është referuar vetë raportit të OSBE/ODIHR për zgjedhjet e vitit 2017, ku thuhet se PD dhe LSI kanë denoncuar vazhdimisht fenomenin e shitblerjes së votës nëpërmjet parave të kanabisit, duke ftuar “disa miq ndërkombëtarë të Ramës” që të mos thellohen në inkriminimin e tyre.
“Vetëm PD dhe LSI kanë denoncuar me fakte operacionin kriminal të shitblerjes së votës, ndërsa PS dhe kryeministri nuk përmenden në raport, sepse ishin frymëzuesit dhe përfituesit e vetëm të operacionit kriminal. OSBE/ODIHR thotë se gjatë fushatës pati aludime për shitblerjen e votës, si PD dhe LSI përsëritën pretendimet e tyre pranë OSBE/ODIHR se ishte kryer operacion masiv për shitblerjen e votave. Opozita në atë kohë konstatoi problemin. Çoi edhe faktet që siguroi. Sot kemi konfirmimin që i vë vulën këtij procesi, që janë dosjet 339 dhe 184, megjithatë janë një grimcë e të vërtetës. Ata nuk bënë asgjë, ky operacion kriminal, vazhdoi dhe pruri këtë vend në buzë të greminës. Raporti i OSBE-së që unë citova, dosja 339 dhe 184 janë prova publike, që kryeministri dhe ca të huaj, klientë të tij, do të mbyllin përfundimisht gojën. I ftoj të mos thellohen në inkriminimin e tyre, që e ka vënë demokracinë në Shqipëri në qorrsokakun më të madh. Faktet flasin vetë, intrigat dhe shpifjet bien poshtë”, ka thënë Vasili, duke iu kundërpërgjigjur kështu përfaqësuesit të OSBE-së.
Borchardt tha sot se akuzat politike dhe akuzat për shitblerje votash duhet të marrin përgjigje konkrete, pasi po minohet besimi i popullit. “Akuzat politike për integritetin e shtetit minojnë besimin e publikut. Siç theksohet në raportin e fundit të ODIHR, autoritetet duhet t’i japin përgjigje akuzave për shitblerje votash pasi është vënë në rrezik besimi i publikut”, u shpreh Borchardt./Opinion.al
