Petrit Vasili, nga selia e Lëvizjes Socialiste për Integrim, ka reaguar në emër të kësaj partie për deklaratat e eurodeputetëve
“Opozita ka verifikuar dukshëm se vota në Shqipëri është blerë nga krimi i organizuar. Ka një dosje 339 që prej dy vitesh mbahet e bllokuar, publikimin e saj e kanë bërë Zëri i Amerikës, Rai dhe shumë të tjera. Çudi e madhe që këta njerëz nuk e kanë dëgjuar. Fajtorët i njeh e gjithë Shqipëria, Dakon e njeh gjithë Shqipëria, çuditërisht shohim që ka harresë të plotë nga zoti Fleckenstein. Shteti ligjor i Edi Ramës, i bekuar nga disa evropian jo europianistë, i mohon. Korrupsioni kaloi oqeanin, u falsifikua firma e sekretarit të shtetit, nuk e shohin përfaqësuesit europianë. Ne do të vazhdojmë t’ia kthjellojmë shikimin. Shumë i turbulluar është shikimi i eurodeputetëve, veçanërisht i mikut të hershëm të shqiptarëve, zotit Fleckenstein. Opozita do vazhdojë të jetë në rrugë dhe do të mbajë shami në dorë për të fshirë sytë e turbulluar të eurodeputetëve për shkak të disa parave, që janë para të pista”, ka thënë ndër të tjera Petrit Vasili.
Sot Fleckenstein tha se kishte mbetur i habitur dhe i zhgënjyer nga qëndrimi i Monika Kryemadhit. “Unë u befasova shumë, u habita por edhe u zhgënjeva shumë, nga kryetarja e LSI-së, për arsye se ajo tha vetëm një fjali në fund, duke na thënë që ata e kanë marrë vendimin e tyre, se në Shqipëri duhet ndërruar pushteti dhe nëse europianët nuk e kuptojnë, nuk është problemi i tyre. Ky është një mesazh i qartë, ata në Bruksel duhet të kuptojnë se në cilën anë gjendet secili prej nesh”, tha sot Fleckenstein./Opinion.al
