David Beckham, u nderua nga Los Angeles Galaxy me një skulpturë të bronztë, për pesë vitet e kaluara në formacionin kalifornian.
Statuja e Beckhamit qëndron në hyrje të stadiumit “Dignity Health Sports Park”, dhe u zbulua në prag të ndeshjes së parë zyrtare të sezonit të ri, mes Los Angeles Galaxy dhe Chicago Fires, e cila u fitua nga vendasit 2-1, falë një goli të shënuar nga Zlatan Ibrahimoviç.
Gjatë ceremonisë së zbulimit të statujës, morën pjesë edhe ish bashkëlojtari i tij te Galaxy, irlandezi Robbie Keane, legjenda e NBA, Kobe Bryant dhe reperi i SHBA Snoop Dogg.
“Galaxy është një skuadër tepër speciale për mua. Të isha pjesë e historisë së saj është një privilegj për të cilin ndihem krenar. Të marr këtë njohje është një nder i madh për mua dhe do t’i jem gjithnjë jashtëzakonisht mirënjohës për mënyrën se si më kanë pritur dhe për atë që klubi, tifozët dhe qyteti i Los Anxhelosit më dhanë mua dhe familjes sime, që nga momenti i parë që arritëm. Jemi ndjerë si në shtëpi”, tha Beckham.
Kjo është hera e parë në historinë e MLS-së, që një lojtar do të ketë statujën e tij./E.M
