Për Lorik Canën, udhëtimi sot drejt Palermos ka qenë një kthim në kohë dhe një krenari më shumë për faktin se si arbëreshët e Sicilisë kanë arritur të ruajnë traditat dhe gjuhën shqiptare për kaq shumë shekuj me radhë.
“Kam menduar disa herë të vija, meqë jam edhe vetë i apasionuar pas historinë. Prej vitesh dëshiroja të udhëtoja në jug të Italisë ku jetojnë shumë arbëreshë. Ishte një mundësi që nuk mund ta humbisja”, tha ai në mikrofonin e “SuperSport” gjatë vizitës në “Piana Degli Albanesi”.
“Është diçka e jashtëzakonshme, që pas gati gjashtë shekujsh ka ende njerëz që e kanë ruajtur traditën, kulturën dhe gjuhën në një vend që nuk është i yni. Është e jashtëzakonshme. Është e rëndësishme që edhe t’i tregojmë Italisë se nuk kemi ardhur vetëm në vitet ’90, por jemi këtu prej lashtësisë. Jam vërtetë i lumtur që ndodhem këtu”, tha ai, duke mos ngurruar që të shprehte këto emocione edhe me postimet e tij në rrjetet sociale.
Sipas tij, vlera e ndeshjes ndaj Italisë nuk e kalon kurrsesi emocionin e kësaj vizite të jashtëzakonshme.
“Sigurisht që rezultati është i rëndësishëm, por emocionet që po ndajmë me bashkëkombësit tanë nuk kanë çmim”.
