Qendrat e votimit në Kosovë janë mbyllur në orën 19:00 dhe pjesmarrja në zgjedhjet lokale ishte rreth 44 përqind. Votat po numërohen me shpejtësi në çdo qendër votimi ç’ka deri nesër në mesditë me gjasë shpallet rezultati përfundimtar. Një sërë komunash mund të shkojnë në balotash, thonë Exit-Pollet.
Gara më e ashpër është ajo për kryeqytetin, Prishtinën. Kështu deri tani (ora 22:00), kryetari aktual Shpend Ahmeti i Vetëvendosjes është në një avantazh të lehtë. Ahmetin e rrezikon shumë Arban Abrashi i LDK-së.
Ajo ç’ka vihet re në zgjedhjet lokale të Kosovës është se LDK-ja e Isa Mustafës po merr rezultate të mira. Kandidati i saj po fiton bindshëm në Fushë Kosovë. Burim Berisha, ka marrë 62.39 për qind të votave, sipas rezultateve paraprake, të publikuara nga organizata “Demokracia në Veprim”. LDK me Gazmend Muhaxherin po udhëheq në Pejë dhe aktualisht ka 50.08 %. Po kështu Lidhja Demokratike e Kosovës në krye me Sokol Halitin ka fituar zgjedhjet në qytetin e Vitisë. LDK-ja me kandidatin për kryetar, Agim Veliu është në avantazh edhe në Podujevë. Qindra simpatizantë të saj po festojnë në këtë qytet. Simpatizantët e LDK-së janë duke festuar edhe Gjilan.
Sipas rezultateve paraprake në qytetin e Prizrenit po prin, PDK me 29.66 % duke pasuar me Lëvizjen Vetëvendosje me 22.7%. Në Drenas gjithashtu po prin Partia Demokratike e Kosovës me 59.72%. Edhe në Ferizaj Kandidati i PDK-së Agim Aliu ka shpallur fitoren.
Kandidati i pavarur, Bekim Jashari, ka fituar bindshëm në Skenderaj, në garën për kryetar komunash, sipas rezultateve paraprake.
Në komunën e Junikut po prin Aleanca për Ardhmërinë e Kosovës me 58.56%.
Lista Serbe ka fituar në raundin e parë të paktën në nëntë komuna. Kjo parti ka arritur të mbledhë 89% të votave në Graçanicë, 77% në Ranillugë, 61% në Partesh, 63% në Mitrovicën e Veriut, 61% në Leposaviq, 52% në Novobërdë, 70% në Shtërpcë, 79%, etj.
/Opinion.al
