James Adeniyi është një nga lojtarët titullarë të Skënderbeut. Newsport.al publikoi një foto të sulmuesit të korçarëve i cili shfaqej në një qendër bastesh.
Menjëherë pas lajmit, 25-vjeçari afrikan ka komunikuar me një prej gazetarëve tanë në kanalin zyrtar në facebook ku i kërkonte të hiqte lajmin dhe llogari pse është publikuar.
Por, pas insistimit të gazetarit tonë që lajmi nuk do të hiqet, atëherë sulmuesi i Skënderbeut provoi një tjetër mënyrë për ta bindur ose “frikësuar” atë.
Ndoshta i shtyrë dhe i rrethuar nga ngjarjet e fundit në kampionatin shqiptar, ku më së shumti janë përmendur thikat dhe plumbat, sulmuesi i Skënderbeut kërcënon duke shkruar: “Më beso, do të gjej kush je dhe nuk do të pëlqejë më vonë. Të betohem që do të pendohesh për lajmin që ke shkruar. Të betohem në Zot që do të pendohesh”, përfundon ai.
Ndoshta futbollisti i Skënderbeut nuk e njeh aspak legjislacionin shqiptar ose ndoshta mendon se jemi akoma në vitet 2000 kur plumbat përfundonin në dhomat e zhveshjes. Por, dikush duhet t’i tregojë 25- vjeçarit që kanosja për shkak të detyrës është e parashikuar dhe dënohet me ligj.
Madje kur gazetari ynë i bën me dije se kërcënimet do të postohen, ai pa hezitim dhe gjithë karshillëk përgjigjet: “Po, postoje”.
Nëse ke vendosur të ndjekësh rrugën e futbollit, atëherë duhet të japësh maksimumin në fushë.
Futbolli është një garë sportive dhe si e tillë duhet trajtuar. Kërcënimet nuk i përkasin botës së sportit.
Shpesh herë na pëlqen ose s’na pëlqen diçka, por të gjithë duhet të jemi të përgjegjshëm për atë që bëjmë. Skedinat dhe bastet le t’ia lëmë sportdashësve për të parashikuar fatin e ekipit të zemrës…
