Ndeshjet e fundit të grupit të botërorit për futbollistët shqiptarë do të jenë një reklamë mjaft e mirë. Sytë e gjithë botës do të jenë në këto dy takime dhe paraqitja e lojtarëve nuk do të kalojë pa u analizuar nga menaxherë apo përfaqësues klubesh. Veç peshës së fanellës, edhe kjo arsye është mjaft e vlefshme për lojtarët që të përpiqen të bëjnë maksimumin në këto dy takime.
Frederik Veseli/Futbollist i Kombëtares
“Ne do të provojmë të fitojmë është e vështirë por ne do të japim maksimumin. Nuk shkojmë me idenë se do të humbasim. Të dy ndeshjet janë të bukura, nuk ka ndryshim nëse është Spanja apo Italia, duhet të bëjmë më të mirën tonë. Jam shumë optimist. Nuk dua të mendoj për humbjen”.
Veseli shpreson në motivimin dhe formën e mirë të skuadrës ndaj Spanjës pasi sipas tij kjo mund të sjellë edhe fitoren
“Do të mundohemi t’u hapnim probleme spanjollëve. Ata kanë më shumë presion se ne. Më vjen inat kur thonë se Italia apo Spanja janë më të forta se ne. Nëse jemi në një ditë të mirë, edhe ne mund të fitojmë ndaj tyre. Kundër Spanjës kemi bërë disa gabime në ndeshjen e parë. Golat që pësuam në ndeshjen e parë ishin si shkak i gabimeve tona. Me cilësitë e Spanjës vijnë edhe golat e tjerë. Shpresojmë që të jemi organizuar mirë, por e thashë edhe njëherë ata kanë më shumë presion se ne”.
I grumbulluar për herë të parë me kombëtaren, Emanuele Ndoj, është shprehu i lumtur për ftesën e Panuccit dhe me dy seanca stërvitore, ka vënë re seriozitetin dhe përkushtimin e skuadrës. Portieri Enea Koliçi u shfaq në stërvitjen e parë të kuqezinjve pas grumbullimit si pasojë e dëmtimit të Thomas Strakoshës. Ansi Agolli dhe Elseid Hysaj u stërvitën të diferencuar për shkak të problemeve të vogla fizike./Tv Klan
