Prej 1 janarit, kur hyri në fuqi ndalimi i lojërave të fatit, janë proceduar penalisht 70 persona në gjithë Shqipërinë. Policia e Shtetit njofton se janë ushtruar 7697 kontrolle në rand vendi, ndërsa të proceduarit akuzohen për “Organizim i lotarive të palejuara” dhe “Vënie në dispozicion të lokaleve të lojërave të palejuara”.
“Vijonë kontrollet për evidentimin dhe ndëshkimin e rasteve të zhvillimit të palejuar të lojërave të fatit. Vetëm një ditë më parë në Tiranë janë evidentuar dhe proceduar 8 persona gjatë operacionit policor “Aplikacioni”. Në këtë kuadër është bashkëpunuar ngushtë me institucionet e tjera agjencitë ligjzbatuese dhe pushtetin vendor për të evidentuar, bllokuar, proceduar ligjërisht e penalisht objektet dhe subjektet që vazhdojnë të shkelin ligjin”, njofton më tej policia.
Gjatë këtyre kontrolleve janë sekuestruar 27 kompjutera, 5 makineta, 7 televizorë, 12 tavolina pokeri, 1100 çipsa. Në cilësinë e provës materiale janë sekuestruar edhe 13 aparate “Dream box” dhe “Smart box”, 9 aparate celularë smartphone, 2 kompjuter laptop.
Personat e proceduar kishin role të ndryshme, kryenin aktivitetin e kundërligjshëm të organizimit të lotarive sportive të palejuara duke përdorur aplikacione dhe platformë në kompjutera, laptop, tableta dhe smartphone. Këta shtetas nëpërmjet llogarive që krijonin në mënyrë elektronike u aksesonin klientëve të tyre bileta elektronike për baste sportive./Opinion.al
