Teatri Kombetar i Operas dhe Baletit ka shpenzuar rreth 1.8 milionë lekë për dizajnimin e logos. Por, logoja e re ka sjellë shumë reagime nga artistë të ndryshëm në rrjetet sociale. Artistët kanë denoncuar se logoja e re e TKOBAP është marrë nga faqja Freepik, një webiste ky i famshëm për modele të gatshme për punime grafike, ku abonimi mujor kushton 10$. Ky denoncim është ngritur fillimisht nga artisti i Arteve Pamore, Ardian Isufi.
Ndërkohë lidhur me këtë çështje ka reaguar edhe Teatri i Operas dhe Baletit përmes një njoftimi zyrtar. TKOBAP thotë se kjo do të duhet të verifikohet dhe çështja do të ndiqet sipas hapave ligjorë.
“TKOBAP, ashtu si shumë institucione private dhe publike në vend dhe në botë, nuk ka kapacitetin dhe burime njerëzore të specializuara për të verifikuar origjinalitetin e një produkti marketingu siç është logo-ja. Plagjiaturat janë një realitet i hershëm i krijimtarisë botërore dhe është pikërisht për të zgjidhur situata të tilla, që mund të ndodhin rëndom dhe janë vështirësisht të evidentueshme në avancë, që çdo punim shoqërohet me angazhime të forta mbi përgjegjësitë ligjore të origjinalitetit nga ana e autorëve.”, thuhet në njoftim./Opinion.al
