Prindërit duhet të jenë të kujdesshëm për cilësinë e lodrave që u blejnë fëmijëve, pasi ka mjaft nga ato që nuk përmbushin standardet. Kreu i Inspektoriatit Shtetëror të Mbikëqyrjes së Tregut, Lavdrim Sahitaj në Klan News u shpreh se muajn e fundit janë bllokuar në treg mbi 3000 lodra të rrezikshme.
“Janë bllokuar afërsisht 3500 lodra vetëm muajin e fundit të cilat janë një sasi jo e vogël. Një vit më parë kemi bllokuar 20.000 të tilla. Për hir të së vërtetës, kemi sjelljen e tregut në standard dhe çdo ditë është përmirësuarr për faktin se importuesit e shumicës janë ndërgjegjësuar që produktet mund të bllokohen dhe shkatërrohen, siç edhe ndodhi”.
Sipas Sahitajt, një pjesë e konsiderueshme e produkteve për fëmijë dhe veçanërisht lodrat kanë në përbërjen e tyre kimikate të rrezikshme siç janë dhe ftalatet.
“Kryesisht janë të rrezikshme lodrat të cilat kanë element kimikë, ftalate, zink, elemente të cilat janë lehtësisht të thyeshme, të gëlltitshme”.
Inspektoriati Shtetëror i Mbikëqyrjes së Tregut u bën thirrje qytetarëve të bëjnë kujdes në përzgjedhjen e këtyre produkteve, duke lexuar etiketat e tyre, e mbi të gjitha të blihen në dyqane të certifikuara./ Klan News
