Deputetja Monika Kryemadhi në një deklaratë për mediat pas takimit me ambasadoren amerikane Yuri Kim deputeten e PD Jorida Tabaku dhe deputetin e PS, Damian Gjiknuri në KQZ tha se ligji për financim të partive politike ka nevojë për rishqyrtim.
Kryemadhi u shpreh se ka ardhur koha që dy partitë e tjera të marrin eksperiencën e LSI apo Partisë së Lirisë sot, që të gjithë donatorët t’i kenë me emër dhe mbiemër.
Për financimin rus në PD me ironi Kryemadhi u shpreh: Kush e ka gëlltitur lugën e çorbë së prishur ka për të vjedhur gjithë jetën.
“Është bërë emergjente ngritja e barrierave për mosdepërtimin e financimeve ruse që cënojnë sigurinë e Shqipërisë, aq më shumë në situatën ku gjendemi. Mendoj që kjo është ajo që kemi ngritur me kohë. Ka më shumë se 6 vite që flas për influencën ruse në vend. Por më mirë vonë se kurrë. Ka ardhur koha që dy partitë e tjera të marrin eksperiencën e LSI apo Partisë së Lirisë sot, që të gjithë donatorët t’i kenë me emër dhe mbiemër. Ligji për financimin e partive politike ka nevojë për rishikim. Duke e bërë burokratike stimulohen më shumë paratë e pista. përgëzoj takimin me Kim dhe bashkëpunimi i gjithë partive të vijojë edhe më tutje. Ka një proces që do vazhdojë të hetohet dhe do hetohet edhe jashtë Shqipërisë. Kush e ka gëlltitur lugën e çorbë së prishur ka për të vjedhur gjithë jetën”, tha ajo.
