Kryetarja e LSI-së, Monika Kryemadhi është shprehur se hetimet ndaj kryetarit të Partisë Demokratike, Lulzim Basha, për lobim rus është një çështje e mbyllur në SHBA.
Gjatë një interviste televizive, kryetarja e LSI tha se pas mbylljes së hetimeve ndaj Bashës, SHBA ka nisur një tjetër hetim për “Mother Jones” për përdorimin e lajmeve dhe instrumentave për të shantazhuar persona të caktuar.
“Nuk jam për të bërë avokaten e Bashës, por në dijeninë time në SHBA procesi është i mbyllur dhe nuk del që ka një lobim të parave ruse, megjithëse nuk më takon mua ta them. Këtu çështja mbahet e hapur dhe sa herë ka Rama problem, Prokuroria thërret Bashën për të larguar vëmendjen. Sa herë del ndonjë skandal, dalin përgjime, Rama fillon një konflikt me Bashën. Është një hetim që ka nisur, ka përfunduar dhe është mbyllur. Ka nisur në bazë të një shkrimi të “Mother Jones” dhe ndërkohë pasi ka mbaruar ky hetim, ka filluar një hetim tjetër për “Mother Jones” për përdorimin e lajmeve, apo instrumentave të tjerë shantazhues ndaj të tjerëve”,-tha Kryemadhi./ Opinion.al E.Xh.
