Gjatë interpelancës me ministrin e Brendshëm, Sandër Lleshaj, deputeti Artur Roshi deklaroi gjendja e policisë është e rëndë madje duke iu referuar rastit të dëbimit të shtetasit turk ai i tha ministrit se policët nuk dinë lexojnë as urdhrat e gjykatës.
“2019-ta nuk ishte ndonjë vit rekordesh pozitiv për këtë ministri dhe duket që 2020 nuk ka filluar mbarë. Situata e krimit është rënduar. Vlen të shtojmë disa pyetje që shqiptarët të kuptojnë kohët që jetojmë. Ndoshta për herë të parë vjen në krye të këtij institucioni një ministër me karrierë ushtarake. Ushtarakët kanë prirjen të jenë në anën e shtetit, janë të interesuar për të drejtat e shtetit dhe jo të individit. Klasa politike ka harruar që shteti përbëhet nga individë për ti shërbyer atyre. Shteti pa individin e humbet funksionin e tij”, tha ndër të tjera Roshi gjatë fjalës së tij.
Megjithatë komentit mbi policinë Lleshaj iu përgjigj duke i dalë atyre në mbrojtje.
“Nëse do ishit të shqetësuar vërtet për fatin e qytetarit në fjalë do ishit kujdesur ta zgjidhnit punë në themel, vendimin e merr një nëpunës i policisë, nga ata që thoni që s’dinë të lexojnë vendimet e gjykatave. Policët e Shqipërisë janë fëmijët e këtij vendi, janë të arsimuar, që dinë të lexojnë literaturë botërore, të bëjnë atë shërbim që s’e bën askush tjetër siç e bëjnë policët e Shqipërisë. Nuk lejoj që të bëhen ofendime globale, që s’dinë policët të lexojnë. E keni bërë pyetjen se çfarë do të ishte Shqipëria pa ata policë?”, tha Lleshaj.
Pas kësaj deputeti Roshi i sugjeroi ministrit të zbuste qëndrimin e tij pas deklaratës “unë jam çdo polic” që ai bëri kur mori detyrën dhe tha se Lleshaj mund të ishte frymëzuar nga këngëtarja Whiteny Huston e cila ka thënë “unë jam çdo grua”. /Opinion.al
