Ministri i ri i Brendshëm, Sandër Lleshaj ka kërkuar këtë të premte, përmes një shkrese zyrtare drejtuar drejtorit të Përgjithshëm të Policisë së Shtetit, Ardi Veliu, dhënien fund të praktikave të postblloqeve policore në akset kryesore të vendit, por jo vetëm kaq.
Me këtë nismë, shefi i Rendit ka kërkuar edhe ndalimin e praktikës së dublimit të semaforëve me punonjës policie, në kryqëzimet e rrugëve urbane.
Duke e konsideruar qarkullimin rrugor si një ndër sfidat e rëndësishme të policisë, ministri Lleshaj ka evidentuar problemet që lidhen me gjendjen e rrugëve, me kulturën e përgjithshme të përdoruesve të saj dhe kualifikimin e pajisjen e punonjësve të policisë.
Ministri thekson se, prania e policisë në numër të tepruar dhe statike nuk sjell ndonjë vlerë të shtuar në rritjen e parametrave të sigurisë rrugore. Prania e postblloqeve policore u jep rrugëve një pamje jo normale, të ndryshme nga ato të vendeve europiane, e krijon përshtypjen e gabuar të një policie shumë të madhe, teksa raportet e numrit të policëve për frymë në vendin tonë janë më të ulëtat në rajon.
“Me qëllim që të përmirësohet më tej niveli i sigurisë në qarkullimin rrugor, kërkoj që të merren masa të shpejta dhe të plota për të zbatuar gjithnjë e më shumë patrullimin, në vend të postblloqeve në akset rrugore të vendit”, nënvizon ministri Lleshaj.
Por si do të bëhet tashmë organizimi i policisë? Kjo do të realizohet përmes organizimit të një sistemi të mirëfilltë patrullimi, të kombinuar me mjete policie të shenjuara, punonjës policie në uniformë e mjete civile, por edhe punonjës pa uniformë.
Në shkresë kërkohet gjithashtu shmangia në maksimum e punonjësve të Policisë Rrugore që dublojnë semaforët. Kjo praktikë ndikon në edukim të gabuar të përdoruesve të rrugës, në raport me rregullat e qarkullimit rrugor. Më tej është edhe projekti për dërgimin e gjobave nëpërmjet Postës, në adresën e shoferëve shkelës të ligjit.
Policia e Shtetit do të aplikojë një plan ambicioz në fushën e qarkullimit rrugor, i cili nis me përdorimin e tabletave dhe vijon më tej me futjen e teknologjisë bashkëkohore (tableta, sensorë, drone) që do të ndihmojnë në mirëmenaxhimin e qarkullimit rrugor.
