Sekretari i Përgjithshëm i PD, Gazment Bardhi e ka cilësuar si një përpjekje për të fshehur të vërtetën, debatin e Ministrit Lleshaj dhe shefit të urbanistikës së Lezhës.
Në një status në Facebook, Bardhi e akuzon Lleshajn si të papërgjegjshëm dhe aktin e tij kriminal. Sipas tij kjo është “dëshmi e gjallë se qeverisemi nga njerëz të pashpirt, që duan të fshehin të vërtetën, duke rrezikuar jetën e qytetarëve!”
Gjatë inspektimit në zonën e Lezhës, Ministri i Brendshëm Sandër Lleshaj e cilësoi si përhapje paniku paralajmërimin e shefit të urbanistikës se një pallat 12 katësh është i rrezikshëm.
Nik Leka, me profesion inxhinier njoftoi Lleshajn se godinës i nevojitet një tjetër ekspertim pasi sipas tij janë dëmtuar arkitrarët në katin e tretë dhe kjo e bën atë të rrezikshme. Pas kësaj Lleshaj i kërkoi atij të pushonte duke ngritur edhe zërin.
Për këtë sjellje të Lleshajt, Gazment Bardhi i ka kërkuar prokurorisë të nisë hetimet për ministrin e Brendshëm për intimidimin e ekspertëve dhe tentativën e tij për t’u fshehur banorëve të vërtetën.
“Këta qeveritarë të papërgjegjshëm, me shpirt të korruptuar janë të njëjtët individë që detyruan ekspertët të ndryshonin aktet e verifikimit për dy pallatet në Thumanë, t’i vlerësonin ato si të banueshme, duke u bërë përgjegjës për humbjen e jetës së 24 qytetarëve. Prokuroria duhet të nisë menjëherë hetimet ndaj Ministrit të Brendshëm për intimidimin e ekspertëve dhe tentativën e tij për t’u fshehur banorëve të vërtetën. Kjo sjellje është jo vetëm papërgjegjshmëri kriminale, por edhe shpërdorim i pastër i detyrës!” shkruan ai ndër të tjera. /Opinion.al
