Ministri i Brendshëm, Sandër Lleshaj, zhvilloi një analizë pune mëngjesin e sotëm me autoritetet kryesore që operojnë në Portin e Durrësit, më i madhi në vend, me gati 40% të të ardhurave doganore. Pavarësisht ndërhyrjeve dhe punës së bërë, ministri i Brendshëm tha se është po ashtu e rëndësishme të shënohet që nevoja për përmirësim është e madhe, duke paralajmëruar ndryshime organizative dhe strukturore në këtë institucion.
“Problemi kryesor këtu në Portin e Durrësit ka të bëjë me faktin që duke qenë port i madh ka edhe shumë autoritete. Siç e shihni vetëm në këtë panel, janë një numër i konsiderueshëm drejtuesish të lartë, Drejtorësh të Përgjithshëm, duke filluar nga Autoriteti Portual, nga Policia e Shtetit, nga AKU, Doganat dhe struktura të tjera, të cilat e bëjnë shumë kompleks menaxhimin e këtij Porti si një entitet të tërë. Është shtruar prej kohësh nevoja që Porti të arrijë në një nivel të lartë integrimi, që të funksionojë si një entitet i integruar, me të njëjtat standarde, me të njëjta procedura, në mënyrë që të evitohen problemet e evidentuara në këtë Port, të cilat lidhen kryesisht me çështje që kanë të bëjnë me trafiqet, kontrabandën, me evazionin, por dhe me probleme që lidhen me sigurinë dhe nuk flas për sigurinë e brendshme të Portit, por me sigurinë e vendit”, ka thënë Ministri i Brendshëm Sandër Lleshaj.
“Më së fundmi, gjatë një kontrolli në strukturat e policisë kufitare kemi evidentuar probleme të rëndësishme, të cilat tregojnë që nevoja për ndërhyrje të thella në drejtim të përmirësimit të standardeve të funksionimit të të gjitha institucioneve që funksionojnë në Port është e lartë”, ka shtuar ai./Opinion.al
