Ministri i Brendshëm, Sandër Lleshaj ka akuzuar kompaninë koncesionare në lidhje me grabitjen e disa milionë eurove në aeroportin e Rinasit. Në një konferencë për mediat ai paralajmëroi kompaninë kineze, duke thënë se siguria kombëtare dhe ajo e jetës së njerëzve prevalon mbi gjithçka.
“Nuk kanë arritur as të sinjalizojnë policinë. Koncesionari jo vetëm ka refuzuar kërkesat e policisë së shtetit për marrjen e masave të sigurisë fizike, por as nuk ka pranuar të ketë korrespondencë zyrtare. Nisur me marrëdhëniet e vështira me koncesionarin, autoritetet shqiptare do të marrin masa të rrepta dhe të forta për të garantuar të gjitha parametrat e sigurisë në aeroportin e Rinasit. Siguria e jetës dhe ajo kombëtare, prevalojnë mbi çdo gjë tjetër”, theksoi zoti Lleshaj.
Numri një i ministrisë së Brendshme tha se policia veproi në mënyrë efikase, ndërsa theksoi se nga ora në orë po shkatërrohet grupi kriminal tejet i rrezikshëm.
“Sa i përket dinamikës së ngjarjes, më duhet të them se reagimi i shpejtë i Policisë së Shtetit, autorët të lënë pas prova të shumta materiale, me të cilat po procedohet. Pas humbjes së djeshme të një anëtari, banda ka marrë një goditje shkatërruese. Shkatërrimi i këtij grupi të rrezikshëm kriminal, është një mesazh për botën e krimit. Më lejoni të falënderoj qytetarët për bashkëpunimin. Në të njëjtën kohë dua të shpreh keqardhjen e thellë për segmente të ndryshme politike, që edhe kur Policia e Shtetit ishte në përballje fizike, nxituan ta sulmojnë. Siguroj qytetarët që përdorin aeroportin, që me masat e marra dhe të tjerat që janë në proces, siguria e tyre do të jetë e plotë dhe maksimale”.
Personi i vrarë gjatë grabitjes të së martës në Aeroportin e Rinasit është Admir Murataj. Protagonist dhe organizator i të paktën tre grabitjeve të tjera të parave të bankave, dy në 2015-n dhe një 2017-n, për të cilën vetëm pak kohë më parë u dënuan 8 persona, Murataj ishte person i shpallur në kërkim prej 2 vjetësh. Ai mbeti i vrarë gjatë shkëmbimit të zjarrit me policinë, pas grabitjes së parave ditën e djeshme.
E gjithë ngjarja në fjalë ndodhi rreth orës 15:00 të së martës. Persona të maskuar dhe të armatosur arritën të grabisnin miliona euro gjatë kohës që po ngarkoheshin në avion.
Autorët hynë në pistën e Rinasit në kohën kur thuajse kishte përfunduar ngarkimi i thasëve me para të tre bankave të nivelit të dytë që operojnë në Shqipëri. Nën kërcënimin e armëve ata morëm thasët me para në pjesën e kargos së avionit./Opinion.al
