Ministri i dorëhequr, Sandër Lleshaj, ndërsa foli lidhur me dorëheqjen e tij bëri të ditur se ky ishte një akt njerëzor, moral dhe politik.
Lleshaj u shpreh se nuk kishte asnjë përgjegjësi për ngjarjen, ndërsa shprehu keqardhjen për familjen që humbi djalin. Gjatë lidhjes në emisionin “Opinion” Lleshaj tha se e kuptonte mjaft çfarë do të thoshte humbja e një fëmije, pasi dhe vetë kishte jetuar një fatkeqësi të tillë.
“Qëllimi është i thellë moral. Unë kam pasur fatin e keq që ta kuptoj vetë se çfarë do të thotë humbja e një fëmije. Nuk e kam treguar, por e kam përjetuar vetë. Dhe jam shumë i prekur nga fakti që një familje shqiptare me shumë dinjitet ka humbur një fëmijë për veprimin apo mos veprimin të një punonjësi të Policisë së Shtetit. Ky është motivi që më ka shtyrë drejt këtij hapi. Por unë e kam përmendur në intervistat e mia që kam marrë postin e kam menduar dorëheqjen dhe kjo është shumë normale”, u shpreh Lleshaj./Opinion.al
