Ministri i Brendshëm, Sandër Lleshaj është thirrur sot në interpelancë në seancë plenare ku është përgjigjur rreth çështjes së dëbimit të shtetasit turk, Harun Çelik si dhe gjendjes së përgjithshme të kanabisit.
Lleshaj tha se rasti i shtetasit turk është vetëm njëri ndërmjet disa dëbimeve që kanë ndërmarrë autoritetet kufitare gjatë vitit të shkuar.
“Me detyrim për vitin e kalkuar u larguan 45 të huaj. Në 2018 janë larguar ose dëbuar nga vendet e BE-së 99345 qytetarë të këtij vendi dhe në 2019, 7180. Ju keni pikasur një turk. Do të ishte e rëndësishme se përpara se ti japim një status politik, të ishin ezauruar hapat e tjerë ligjorë. Mund të kërkonit hetim administrativ ose nëse ka pasur dyshime se rasti është cenuar, shkelje penale, mund të ishte inicuar hetim penal”, tha Lleshaj dhe shtoi se dëbimi i këtij shtetasi është bërë nga autoritetet përkatëse dhe jo nga ai vetë.
Sipas Lleshajt, Harun Çelik nuk kishte ngritur pretendime dhe se ndaj tij ishte zbatuar ligji për të huajt duke iu dhënë e drejta e ankimimit. Mesa duket ministri Lleshaj nuk e ka lexuar urdhrin e dëbimit të shtetasit turk dhe as nuk ka ndjekur deklaratat e europarlamentarëve të cilët kërkojnë sqarime për këtë rast i cili është konsideruar shqetësues sa i përket të drejtave të njeriut. Sipas urdhrit të dëbimit të Harun Çelik, atij i janë dhënë “0” ditë afat për të animuar vendimin dhe dëbimi i tij është bërë në një ditë pushimi, 1 janar, pra ishte praktikisht e pamundur që ky shtetas të ankimonte vendimin për dëbimin e tij.
Lexo edhe: Iu dha 0 ditë afat për tu ankuar, zbardhet vendimi i dëbimit të gylenistit
Sa i përket kanabisit dhe gjendjes së rendit, ministri Lleshaj tha se Në 2019 kemi minimum historik të kultivimit të kanabisit dhe këtë e argumentoi me faktin se ka më pak ngarkesa të kapura në itali se një vit më parë. Lleshaj tha se këto janë të dhënat e policisë së shtetit dhe se “atyre iu beson më shumë” nga të gjithë të dhënat e tjera
“Në tregun e brendshëm sipas të dhënave të policisë, çmimi i shitjes së kanabisit, në tregon e zi, është maksimumi historik prej rreth 800 euro për kg” shtoi ai.
“Nëse para 7 vitesh kishim 130 vrasje në vit, tani kemi 50 vrasje në vit. Rendi është në ditët më të mira historike, por jo ajo që duam. Ju sfidoj të jepni shifra dhe jo konkluzione në ajër”, tha Lleshaj për gjendjen e rendit ndërkohë që vetëm në ditët e para të vitit ndodhën 5 vrasje, pra 10% e vrasjeve vjetore të raportuara nga ministry. /Opinion.al
