Ministri i Brendshëm Sandër Lleshaj ka reaguar pas deklaratës së kryetares në detyrë të Bashkisë së Shkodrës Voltana Ademi ku ajo akuzoi atë dhe kryeministrin Rama se po sulmonin shkodranët për të fshehur dështimin e tyre në menaxhimin e krizës së koronavirusit.
Sipas Lleshajt kryebashkiakja e Shkodrës nuk justifikon as pagën që merr ndërsa akuzat e saj ai i cilëson llafazanërira politike.
Ministri i Brendshëm shton se situata në Shkodër është ulëritëse dhe se qytetarët janë frikshëm të ekspozuar ndaj rrezikut të epidemisë.
“Pazaret skandaloze, që ngjajnë me ato të Kandaharit, nuk i bëjnë as nder dhe as dobi kryeqendrës sonë të Veriut. Eliminimi i tyre kërkon vetëm pak vullnet, por në radhë të parë sy për të parë.
Zonja Ademi të dalë dhe të heqë lakrat, barishtet e plehrat gjithfarë që kanë zënë rrugët e trotuaret.
COVID-19 është sfida e përbashkët dhe rrugët e këtij armiku të padukshëm duhet të bllokohen edhe në Shkodër, ku dorëzimi i papranueshëm i pushtetit vendor duket alarmant! Ne duam bashkëpunim dhe bashkëveprim”, shkruan ndër të tjera ministri i Brendshëm Lleshaj.
Reagimi i plotë i ministrit të Brendshëm, Sandër Lleshaj
Kryebashkiakja e Shkodrës e lexoi jo pa vështirësi një deklaratë të panevojshme, për të shitur si politike, paaftësinë e saj për të bërë disa detyra bazike në shërbim të qytetarëve të saj. Shkodra sot nuk ka nevojë për politikë, por për pastërti dhe qytetari nga të gjithë.
Pazaret skandaloze, që ngjajnë me ato të Kandaharit, nuk i bëjnë as nder dhe as dobi kryeqendrës sonë të Veriut. Eliminimi i tyre kërkon vetëm pak vullnet, por në radhë të parë sy për të parë.
Edhe pse pa mandat, kryetarja e harruar në zyrë duhet të justifikojë të paktën pagën që megjithatë merr.
Situata në Shkodër është ulëritëse dhe qytetarët shkodranë janë frikshëm të ekspozuar ndaj rrezikut të epidemisë.
Zonja Ademi të dalë dhe të heqë lakrat, barishtet e plehrat gjithfarë që kanë zënë rrugët e trotuaret.
COVID-19 është sfida e përbashkët dhe rrugët e këtij armiku të padukshëm duhet të bllokohen edhe në Shkodër, ku dorëzimi i papranueshëm i pushtetit vendor duket alarmant! Ne duam bashkëpunim dhe bashkëveprim.
Ju lutem zonja Ademi mos humbni kohë me llafazanërira politike, por bëni punën tuaj dhe na thoni si mund t’ju ndihmojmë më shumë! /Opinion.al
