Protesta e banorëve të Unazës së Re ka hyrë në ditën e 18-të, duke këmbëngulur në dëmshpërblimin 100 përqind të vlerës së banesave të tyre që do të prishen nga zgjerimi i unazës.
Për projektin e “Unazës së Madhe” parashikohet që të shemben 317 objekte, 163 prej të cilëve janë në proces legalizimi dhe 123 janë me vërtetime pronësie.
Autoritetet thonë se do të veprohet sipas ligjit duke kompensuar vetëm ndërtimet e ligjëruara, ndërsa ato joligjore do të ndihmohen me dhënien e bonuseve të qirasë deri në tre vjet.
Edhe në protestën e kësaj të mërkure, banorët mbanin në duar pankarta me mbishkrimin: ‘Jemi qytetarë, nuk jemi shpellarë’, apo edhe ‘Shtëpia mbrohet me jetë’.
Banorët janë shprehur: “Nuk ka asnjë fije transparencë, as nga qeveria as bashkia, ne sikur jemi geto afrikane, jo qytetarë të Tiranës. Qeveria edhe mund të na terrorizojë, por ne me trupin e jetën tonë do i mbrojmë banesat.“
Ata kanë bllokuar rrugën, ndërsa shprehen se i kanë banesat në proces legalizimi dhe kërkojnë dëmshpërblim me vlerën e tregut.
Në mbështetje të protestuesve ishin deputetë të opozitës, por edhe aktivistë të shoqërisë civile dhe ata që kundërshtojë prishjen e Teatrit Kombëtar.
