Këtë të Dielë, kryeministri Edi Rama ka nisur konsultimet me drejtuesit politikë të PS-së në 12 qarqe.
Pas takimeve që zhvilloi 2 ditë me radhë, tashmë do të ketë diskutime të drejtpërdrejta me kandidatët për deputetë të kësaj force politike, në vilën qeveritare.
Do të jetë Kryesia e Partisë Socialiste ajo që do vendosë në fund sa i takon listës së plotë të kandidatëve për 11 Majin. Ndërkohë, sa i përket formulës që ka zgjedhur Rama për hartimin e kësaj liste, deputetët që kanë më shumë se 2 mandate me shumë gjasë do jenë në listë të hapur.
“Do luftojnë për të mbajtur karrigen e tyre në Kuvendin e Shqipërisë”, raportoi gazetari i Klan News Enkel Xhangoli.
Ndërsa për emrat e rinj, parashikohet që të jenë në listë të mbyllur.
Megjithatë më 12 Mars, do të qartësohet gjithçka, pas dorëzimit të kësaj liste në Komisionin Qendror të Zgjedhjeve (KQZ).
Pritet që vetë kreu i qeverisë të kandidojë për Tiranën, në listë të hapur.
Edhe të Premten e të Shtunën, në fokus të bisedimeve mes socialistëve ka qenë përgatitja për zgjedhjet parlamentare, ndërsa ministra e drejtues politikë kanë raportuar mbi punën e tyre.
