“Nëse shkoni në qytetet e Shqipërisë keni punonjës policie që shkojnë dhe terrorizojnë qytetarë dhe mbështetës të opozitës në familje. I marrin i shoqërojnë, i mbajnë me dy apo tre orë në komisariat pa asnjë shkak e asnjë shpjegim. Po merren në polici edhe kandidatët e listave vijuese të PD-së, mbahen në komisariat pa asnjë shpjegim me orë të tërë”.
Kështu do të deklaronte në emisionin “Opinion” ditën e enjte, Sekretari i Përgjithshëm i PD-së, Gazment Bardhi. Në fakt bëhet fjalë për ish-futbollistin e njohur fierak, Pandeli Tole.
Ky i fundit këtë të premte ka dalë para gjykatës, me akuzën për organizim dhe pjesëmarrje të protestave dhe tubime të paligjshme. Pandeli Tole i cili është edhe kandidat për deputet në listat e PD-së, qarkut Fier, është njohur nga gjykata me akuzën e mësipërme.
Në fund të seancës, gjyqtari i çështjes ka lënë në fuqi kërkesën e prokurorit duke lënë të lirë Tolen, me detyrim paraqitje. /Opinion.al
