Të gjithë të kthyerit nga Siria në Kosovë janë lënë të lirë nga “Qendra për të Huaj” në fshatin Vranidoll të Prishtinës, ku mbaheshin që nga dita e shtunë. Lajmi u konfirmua nga Prokuroria Speciale e Kosovës, e cila shtoi se 32 gra të kthyera janë duke u hetuar nga institucionet e Kosovës.
“Hetimet do të vazhdojnë, sepse ato edhe më parë kanë qenë nën hetime, por hetimet janë pezulluar për shkak se kanë qenë të paarritshme për prokurorinë, kështu që do të rifillojnë hetimet për 32 prej tyre, për momentin”, konfirmuan zyrtarë nga prokuroria.
Kujtojmë se mesnatën e së premtes në Kosovë 110 kosovarë janë kthyer nga Siria, ndërsa u bë e ditur se në zonat e konfliktit kanë mbetur rreth 30 luftëtarë, 49 gra dhe 8 fëmijë.
Më shumë se 300 qytetarë të Kosovës, kryesisht të rritur, kanë shkuar në vitet e fundit në Siri dhe Irak për të luftuar krah militantëve të Shtetit Islamik, ndërsa më shumë se 70 prej tyre janë vrarë.
Në një raport të publikuar në muajin shkurt, Qendra Kosovare për Studime të Sigurisë ka nxjerrë në pah se qytetarët e Kosovës nuk e dëshironin kthimin e luftëtarëve të huaj në vend, pasi i konsiderojnë si shqetësim për sigurinë, ndërsa të kthyerit nga Siria rrezikojnë deri në 15 vjet burgim, sipas një ligji të hartuar në vitin 2015, i cili u ndalon kosovarëve të marrin pjesë në luftëra të huaja./Opinion.al
