Judmir Shurdhi, drejtor i burgut të Lushnjës është arrestuar në orët e para të mëngjesit nga Shërbimi i Kontrollit të Brendshëm të Burgjeve. Në pranga ka përfunduar edhe Llazar Mino, me detyrë kartelist pranë këtij burgu. Ata janë arrestuar për shkak se akuzohen se kanë liruar përpara kohe nga qelia të dënuarin Lulzim Caka.
Ministrja e Drejtësisë, Etilda Gjonaj deklaroi se pas lirimit të Cakës, i dënuar me 25 vite burg, ka urdhëruar hetimin e çështjes me grup të përbashkët hetimi nga Drejtoria e Përgjithshme e Burgjeve, Shërbimi i Kontrollit të Brendshëm në Burgje (SHKBB) dhe stafi i Ministrisë së Drejtësisë. Dyshimet ishin se Caka ishte liruar përpara kohe.
“Në përfundim të këtyre hetimeve, ka rezultuar se shtetasi Lulzim Caka është liruar nga IEVP-Lushnjë 4 muaj e 22 ditë përpara shlyerjes së plotë të dënimit, për shkak të përllogaritjes në mënyrë të gabuar nga ana e kartelistit të IEVP Lushnjë dhe lëshimit të urdhrit të lirimit në mënyrë të kundraligjshme nga Drejtori i IEVP Lushnjë”, tha ministrja.
Dy të arrestuarit akuzohen se kanë konsumuar elementë të veprës penale të “Shpërdorimit të Detyrës” parashikuar nga Neni 248 i Kodit Penal dhe “Falsifikim të dokumenteve” parashikuar nga neni 186 /3 i Kodit Penal.
Lulzim Caka, që njihet si “i forti i Beratit”, është shpallur në kërkim nga autoritetet. Banda kriminale e Lulzim Cakës veproi nga viti 1995 deri në 2000 në zonat e Beratit, Lushnjes dhe Fierit. Ai akuzohet për disa vrasje dhe ngjarje të tjera kriminale, dhe për këto ishte dënuar me 25 vite heqje lirie./ Opinion.al
