Gjykata ka vendosur detyrim paraqitje për ish-shefin e sigurisë së burgut në Durrës Bledar Toçi, që ekzekutoi me armën e shërbimit Dritan Haxhollin, brenda ambienteve të shtëpisë së Marsida Qatjas, në tetor të vitit të shkuar. Gjykata pranoi kërkesën e tij duke ndryshuar masën e sigurisë nga arrest me burg në detyrim paraqitje pasi ka ndryshuar edhe akuzën.
Gjyqtari Genti Dakolli pranoi kërkesën për të ndryshuar akuzën nga “vrasje në kapërcim të vetëmbrojtjes së nevojshme” në “vrasje për vetëmbrojtje”. Për këtë arsye, në fund gjyqtari ka pranuar edhe kërkesën për ndryshimin e masës së sigurisë nga arrest me burg në detyrim paraqitje dy herë në muaj. Në vendimin e gjyqtarit për ndryshimin e masës së sigurisë, duket se ka ndikuar edhe situata nga COVID-19.
Ngjarja e Tetorit 2019
Dritan Haxhollit u ekzekutua në banesën e 30 vjeçars, Marsida Qatja, ndërsa autori i krimit është Bledar Toçi, ish-shefi i sigurisë së brendshme në burgun e Durrësit.
Fillimisht u tha se ngjarja ndodhi për motive pasioni, ndërsa vet Qatja deklaroi se Haxholli e kishte shqetësuar disa herë atë dhe se e përndiqte i armatosur. Për këtë arsye, deklaroi ajo, kishte thirrur në ndihmë Bledar Toçin, i cili gjatë përleshjes e qëlloi me armë duke e lënë të vdekur.
Ndryshe nga sa u duk në fillim se vrasja erdhi si një konflikt pasioni me në qendër Marsida Qatjan, Prokuroria ka zbuluar se viktima dhe autori kanë pasur konflikte të mëparshme, që nuk lidheshin me 30-vjeçaren.
Në telefonin e të dyve Prokuroria ka gjetur mesazhe, ku Dritan Haxholli e kërcënonte Toçin, duke i kërkuar para. Haxholli ishte një konsumator lëndësh narkotike dhe Prokuroria ka dyshime se mes të dyve mund të ketë pasur konflikte edhe për drogë. Në telefonin e Haxhollit Prokuroria ka gjetur komunikime dhe kërcënime edhe me persona të tjerë në Kavajë dhe biznesmenë, të cilëve u kërkonte para./Opinion.al
