Ky është liqeni më i madh termal nëntokësor në botë dhe ndodhet në jug të Shqipërisë. Ky zbulim i jashtëzakonshëm pranë kufirit më Greqinë është bërë nga një ekip shkencëtarësh çek.
Me një gjatësi prej 138 m, një gjerësi prej 42 m dhe një perimetër 345 m, liqeni mund të mbajë 8,335 m3 ujë të nxehtë.
Mediat çeke shkruajnë se madhësia e kupolës së liqenit është tre herë më e madhe se salla kryesore e Teatrit Kombëtar në Pragë.
Ky zbulim vjen në dritë pas një ekspedite intensive që përdori teknologji të avancuar për eksplorimin e thellësive të shkëmbinjve.
Mediat çeke shkruajnë se shkencëtarët çekë kanë eksploruar prej disa vitesh situatën komplekse nën tokë, brenda luginave të zonave kufitare malore midis Greqisë dhe Shqipërisë, aty ku edhe është bërë zbulimi.
Liqeni është quajtur NEURON në nder të fondacionit me të njëjtin emer që financoi ekspeditën.
Sipas studiuesve ky zbulim mund të kontribuojë në mbrojtjen e të gjithë zonës ku gjendet liqeni.
