Policia e Vlorës njoftoi dje se ka ushtruar kontrolle në vijën bregdetare për mjetet lundruese. Mes atyre që u gjobitën ishin edhe anije peshkimi, që peshkonin në zona të mbrojtura.
Në redaksinë e emisionit “Stop” kanë mbërritur disa denoncime, që thonë se në Shirokë, në liqenin e Shkodrës peshkohet me korrent, në zonë të mbrojtur e në periudhë kur peshqit lëshojnë vezët.
“Stop” shkoi në vend për të parë situatën. Pas një vëzhgimi të lehtë me sy, vërejtëm rreth 10 varka, që peshkonin në liqen.
Nga një vëzhgim më i afërt pamë, se varkat kanë të lidhura tela korrenti, ndërsa peshkatarët mbajnë një rrjetë. Me ndihmën e korrentit, peshkatarët marrin nga liqeni peshkun dhe e fusin në varkë.
“Stop” telefonoi Policinë e Shtetit dhe Drejtorin e Zonave të Mbrojtura, Agim Dardha, por askush nuk reagoi.
Policia: Urdhëro!
Qytetari: Policia e shtetit?
Policia: Po!
Qytetari: Përshëndetje! Si je?
Policia: Mirë! Juve mirë?
Qytetari: Mirë! Po kaloja këtej nga Shiroka, po dilja xhiro dhe po shoh gjithë këto varka, gjuajnë peshk me korrent.
Policia: Atje është, atje është drejtoria, drejtoria e kësaj, shërbimit, te lokalet aty.
Qytetari: Nuk të kuptova.
Policia: Atje në hyrje të Shirokës është Drejtoria e Peshkimit.
Qytetari: Unë po të them ty si polici e shtetit, se e di që nuk lejohet, prandaj po të them.
Policia: Do çoj unë shërbimin tani mos ki merak!
Qytetari: Ok! Mirë! Faleminderit!/tvklan.al
