Propozimi i ligjit nga ana e PS-së për faljen e gjobave ka sjellë tensione në Parlament.
Kreu i grupit parlamentar të PD-së, Gazment Bardhi është përplasur me deputeten socialiste, Blerina Gjylameti, pasi kjo e fundit i ka kërkuar të “lënë teatrin” që po zhvillojnë në parlament.
“Lini teatrin! Të marrë fjalën zonja Ina, nëse zoti Berisha do gjithë vëmendjen, lini interpelancën e të vijë ai”, tha Gjylameti.
Bardhi e replikoi duke e cilësuar atë dhe kolegët socialist “kukulla të Edi Ramës”.
“Kur i referohesh deputetëve si kukulla, besoj i referoheni vetes që jeni kukulla të krimit të organizuar, oligarkëve, ligjeve të porositura. Kukulla të Ramës! Pa merak se Berisha do vijë shumë shpejt!”, tha Bardhi.
Ai shtoi se këto gjoba i vuri qeveria e PS-së si presion kriminal ndaj qytetarëve e tani që janë afruar zgjedhjet vijnë me një projekt-vendim të tillë.
“Këto gjobat i vendosi Berisha dhe opozita apo Rama dhe ju të tjerët në secilën zonë për të terrorizuar qytetarët. Ato gjoba janë presion kriminal. Narko-trafikant mos u shqetëso! (i drejtohet ministrit Hoxha) Shqetësimi që kemi ne është se ju po e shkruani ligjin tani dhe vini e na thoni… 10 minuta pushim që ju të shumëfishoni një kopje, po e presim ka kaluar një orë e s’ka ardhur akoma. Ju si kukulla nxirrni kartonët jeshilë!”, tha Bardhi.
