Sonte në mbrëmje shqiptarët katolikë, por edhe e mbarë bota katolike festojnë Krishtlindjen, apo ndryshe lindjen e Krishtit. Ashtu sikur e do tradita, në të tilla festa, drejtuesit kryesorë të shtetit, dërgojnë kartolinat e tyre të urimit, të cilat shoqërohen me simbolet vizuale të festës. Një të të tillë u ka dërguar shqiptarëve nëpërmjet rrjetit social facebook edhe kryeministri Edi Rama. I cili e ka shoqëruar urimin e tij me fotografinë e rrasës së gurit ku e shtrinë Jezu Krishtin, përpara se ta gozhdonin në kryq.
“Kjo pamje e rrasës së gurit ku e shtrinë Jezu Krishtin e mbytur në gjak përpara se sa ta gozhdonin në kryq, shëmbëlltyrë e vuajtjeve njerëzore në rrugën e Ringjalljes, na flet të gjithëve në vigjiljen e kremtimit të Krishtlindjeve… GËZUAR KRISHTLINDJET TË GJITHËVE!” – shkruan kryeministri Rama në rrjetet sociale.
Ajo që të habit është se sonte janë Krishtlindjet, pra kremtohet Lindja e Krishtit dhe jo Pashkët që kanë lidhje me kryqëzimin dhe ringjalljen e tij? A është gafë kjo kartolinë apo një kartolinë me një mesazh të caktuar që Kryeministri Edi Rama ka dashur të thotë diçka?!
