Kryetari i partisë Nisma për Kosovën, Fatmir Limaj, ka thënë se zgjedhjet janë e vetmja rrugë për ta zgjidhur krizën politike që ka përfshirë vendin.
Ai ka thënë se zgjedhjet janë nevojë, dhe jo vetëm kërkesë e opozitës, për ta tejkaluar situatën aktuale në Kosovë.
“Zgjedhjet do të prodhojnë rifreskim të skenës politike”, ka thënë Limaj në një intervistë për transmetuesin publik.
Limaj ka vlerësuar që Kosova ka mundësi të mbajë zgjedhje në çdo kohë, me vullnet të partive, dhe ka thënë se pret që zgjedhjet të mbahen shumë shpejt.
Ish-komandanti i Ushtrisë Çlirimtare të Kosovës ka vlerësuar se Qeveria aktuale e vendit nuk po funksionon, dhe se nuk po arrin të gjejë zgjidhje për problemet e shumta në vend, transmeton Gazeta Express.
“Jemi të gatshëm qysh nesër të marrim pjesë në zgjedhje. A na konvenon a jo, kjo është çështje tjetër”, ka thënë Limaj.
Kreu i Nismës për Kosovën ka thënë se partia e tij do të hyjë në zgjedhje në një koalicion me Aleancën për Ardhmërinë e Kosovës, që udhëhiqet nga Ramush Haradinaj.
“Ka ardhur koha që bandat t’i çojmë në shtëpi”, është shprehur Limaj, transmeton Gazeta Express.
“T’i largojmë njerëzit që po e ngufatin shtetin”, ka thënë ai. “Nëse vonohemi do të kemi pasoja”, ka shtuar Limaj.
Limaj ka premtuar se me Nismën në udhëheqje të vendit, brenda dy vjetësh Kosova do të kishte sistem tjetër të drejtësisë.
Ai ka thënë se shteti ligjor është kyç për përparimin e Kosovës, në çdo aspekt.
Më herët, Limaj ka folur për akuzën e re të ngritur sot ndaj tij për krime lufte, duke thënë se drejtësia e ka thënë fjalën e saj për të, dhe se tani vetëm po përndiqet.
