Gjykata e Shkallës së Parë në Gjirokastër ka lënë në burg Thoma Mastora, 69-vjeçarin e dyshuar si autori i vrasjes së dy të moshuarve katër ditë më parë në Dropull, 84-vjeçarin Kosta Ilia dhe gruan e tij Kleoniqi Ilia, 88 vjeçe.
Në një prononcim për mediat, avokati i Thoma Mastora shprehet kundër vendimit të Shkallës së Parë të Gjykatës që la në burg klientin e tij.
Avokati ka hedhur dyshime të forta në vërtetësinë e provave të shfaqura nga grupi hetimor, ndërkohë që sipas tij, asnjë prej tyre nuk ka lidhje me përfshirjen në krim të klientit të tij.
Avokati ka kërkuar masë më të lehtë për Mastoran nisur nga gjendja e tij shëndetësore apo dhe mosh, ndërkohë që hodhi poshtë pretendimet se klienti i tij është i sëmurë mendor.
Edhe Mastora ka mohuar të jetë autori i ngjarjes, por sipas hetimeve të policisë në banesën e të moshuarve janë gjetur prova që e implikojnë në ngjarjen e mistershme.
