Pas miratimit në Kuvend të ligjit për zonat e mbrojtura ka reaguar Delegacioni i BE në Tiranë.
Delegacioni i BE shkruan se anëtarësimi i Shqipërisë në BE kërkon përpjekje të vazhdueshme nga qeveria dhe parlamenti për të siguruar që legjislacioni i vendit tonë të përafrohet me standardet evropiane.
Më tej në reagim thuhet se Delegacioni i BE-së do të ndjekë me shumë vëmendje zbatimin e dispozitave të reja ligjore për zonat e mbrojtura, sipas kuadrit ligjor të BE-së për mbrojtjen e mjedisit dhe angazhimeve ndërkombëtare të Shqipërisë.
“Rruga e Shqipërisë drejt anëtarësimit në Bashkimin Evropian është e qartë. Ajo kërkon përpjekje të vazhdueshme nga qeveria dhe parlamenti për të siguruar që legjislacioni shqiptar të përafrohet me standardet evropiane.
Në kuadrin e negociatave të anëtarësimit, miratimi i ligjeve mbi çështje që mbulohen nga legjislacioni i BE-së presupozon konsultim publik të mirëfilltë dhe gjithëpërfshirës, si dhe një proces të parashikueshëm dhe transparent.
Delegacioni i BE-së do të ndjekë me shumë vëmendje zbatimin e dispozitave të reja ligjore për zonat e mbrojtura, sipas kuadrit ligjor të BE-së për mbrojtjen e mjedisit dhe angazhimet ndërkombëtare të Shqipërisë”, thuhet në postim.
