Ligji i miratuar me forcën e kartonëve të Partisë Socialiste dhe Partisë Demokratike për të detyruar mediat që t’u japin atyre reklama propagandistike falas gjatë fushatës elektorale, pas juristëve, po kundërshtohet edhe brenda radhëve të politikës.
Deputetja Mesila Doda, ish –kryetare e Këshillit Kombëtar të Radio – Televizionit, e quan këtë ligj si një kambanë alarmi që cënon lirinë e medias, të biznesit dhe pronën private.
Mesila Doda, deputete e PDIU: “Është diçka që nuk u shërben mediave. Me një pakt mes dy partive politike u ra dakort që edhe televizionet private duhet që të transmetojnë reklama falas për të gjitha partitë politike. E dini çfarë do të thotë kjo? Nesër ata mund të vijnë në shtëpinë e secilit prej nesh dhe të thonë që kjo shtëpi është e imja sepse na duhet për seli partie. Kjo është këmbana e parë e alarmit, kur dy forcat politike duan të sekuestrojnë pronën e tjetrit. Ky nuk është standard demokratik. Mediat kanë nevojë për mbështetje dhe ju duhet të respektoni pronën private të secilit”
Juriste të njohur të fushës e quajtën absurd ligjin e miratuar me marrëveshjen Rama – Basha. Ish –kryetari i Komisionit Qendror të Zgjedhjeve tha për Tv Klan se ligji bie në kundërshtim të hapur me Kodin Zgjedhor.
Sipas tij, mediat janë të detyruara t’i binden Kodit Elektoral dhe jo këtij ligji, pasi është kodi ai që prevalon në fushatë. Ligji që detyron Televizionet Private t’u japin reklama falas partive politike, bie në kundërshtim me vetë Kodin, që parashikon se reklamat politike bëhen kundrejt pagesës.
Juristet thonë se me ligjin Rama – Basha, që e hartuan me nxitim brenda ditës, pa u konsultuar me grupet e interesit dhe as me vetë deputetët e komisioneve parlamentare nga duhet të kalonte drafti, dy partitë e mëdha politike kanë vënë në vështirësi edhe Komisionin Qendror të Zgjedhjeve, pasi ai do të duhet të respektojë Kodin Elektoral dhe jo ligjin për Partitë Politike. /Tv Klan
