Ilir Beqja ka kërkuar në Kuvend mosmiratimin e projektligjit “Për disa ndryshime dhe shtesa në ligjin nr.9636, datë 6.11.2006, “Për mbrojtjen e shëndetit nga produktet e duhanit”.
Sipas ish-ministrit të Shëndetësisë, projektligji duhet të shtyhet pasi propozimet e ardhura nuk e zgjidhin problemin, teksa kujtoi se fillimisht ligji duhet të zbatohet në godinën e kuvendit. Ai shtoi se nuk është e drejtë të rëndohen shkelësit kur vetë parlamentarët nuk janë të gatshëm për ta zbatuar gjinin.
“Propozoj që projektligji “Për mbrojtjen e shëndetit nga produktet e duhanit” të mos votohet sot dhe të shtyhet pasi propozimet e ardhura nuk e zgjidhin. Ne fillimisht duhet ta zbatojmë vetë këtë ligj në godinën e kuvendit dhe kryesinë e Kuvendit, nuk është e drejtë të rëndojmë shkelësit, ndërkohë nuk jemi vete të gatshëm për ta zbatuar. Ta zbatojmë këtu një herë, e më pas ta votojmë”, u shpreh Beqja.
Kreu i Kuvendit, Gramoz Ruçi iu kundërpërgjigj duke thënë se kjo retorikë nuk është arsye për ta hequr nga rendi i ditës, teksa i kërkoi ish-ministrit që të denoncojë rastet konkrete duke nisur prej vetë atij që është duhanpirës.
“Nuk është arsye për ta hequr nga rendi i ditës, kjo është retorikë. Duhet ta denoncosh këtë rast, duke filluar nga unë si duhanpirës”, tha Ruçi./Opinion.al
